٥ أعمال فنية عربية كسرت القالب المعتاد للدراما العربية
خلي بالك من زيزي:
خلي بالك من زيزي مسلسل مصري إجتماعي شفناه في رمضان ٢٠٢١ وكان بطولة أمينة خليل ومحمد ممدوح ومن تأليف العبقرية مريم نعوم وإخراج كريم الشناوي.
المسلسل تمحور حوالين شخصية زيزي البطلة المتمردة العنيدة وازاي حياتها بتنهار من أول حلقة في المسلسل، وتسرد لنا الأحداث عنف ردود أفعالها تجاه الأمور وطريقة تعاملها مع مشاكلها والناس الموجودين في حياتها.
مع الاستمرار في متابعة الحلقات بيتضح لنا تشخيص طبيبها النفسي ليها بال ADHD،
ومن ألطف عناصر المسلسل هي إلقاء الضوء على الجانب المظلم من كل كاراكتر عشان يكشفلنا عن سبب صفة واضحة ومهمة موجودة ضمن تركيبة شخصيته.
المسلسل عرف بكل سلاسة مناقشة أمور مختلفة زي أهمية استشارة طبيب نفسي ببساطة وبدون الشعور بالغرابة، والتواصل الاجتماعي بين الآباء والأمهات للحد من التفكك الأسري، والفوبيات ونقط عدم الأمان عندنا كبشر، ومواضيع تانية كتير تخص كل شخصية على حدة.
البحث عن علا:
كانت مبادرة مؤثرة من صناع العمل الفني أنهم يركزوا على الست المصرية المتواجدة في مجتمع شرقي في مرحلة عمرية معينة وخاصة نظرة الناس ليها بعد الإنفصال.
هند صبري فاجئتنا بإبداع تمثيلي وواقعي في دورها لعلا اللي جري بيها العمر في كونها شابة بتبحث عن العريس المناسب بضغط مجتمعي نمطي، وكونها زوجة وأم مجاتلهاش الفرصة أنها تعرف حقيقة نفسها وتتعرف على ميولها وهواياتها أو ببساطة تعرف هي "عايزة إيه؟"،
المسلسل من إنتاج نتفلكس وبيكمّل المسلسل الكوميدي الإجتماعي "عايزة أتجوز" اللي كان في رمضان ٢٠١٠.
اصحاب ولا اعز:
فيلم أصحاب ولا أعز اللبناني بيورينا مجموعة أصدقاء في منتصف عمرهم بتجمعهم علاقة قديمة وقوية، ومن خلال تجمع واحد ليهم في سهرة بيت حد منهم بيكتشفوا حاجات عن بعض بتفاجئ كل شخص بحبيبه أو صاحب عمره، ودة بيتم عن طريق لعبة معينة قرروا يلعبوها وبتتوالى أحداث الفيلم.
أصحاب ولا أعز ثار جدل كبير على السوشيال الميديا لمجرد أن ممثلة مصرية شاركت في العمل وكان العين عليها من حيث تصرفاتها طبقا للدور اللي بتلعبه وخاصة أنها ست.
سابع جار:
من أخف المسلسلات المصرية اللي نحب نتفرج عليها تاني وتالت وفي أي مرحلة عمرية أو فترة زمنية لأنه شبه حياتنا وأفكارنا اليومية والمواقف الحتمية اللي لازم كلنا نمر بيها زي الافراح ومشاكل العمارة والبواب ومصاريفنا وفواتيرنا والخناقة مع ماما وبابا واقتناعنا أنهم عمرهم ما هيفهمونا.
المسلسل ممتاز ومهم عشان يكسر الstreotype بتاع قيم الأسرة المصرية الأصيلة وبيركز على إننا كلنا كبني آدمين لينا أكتر من جانب في شخصياتنا، ومن حقنا نتعامل مع كل دايرة معارف أو مجتمع بالطريقة المناسبة لينا.
الروابي:
الروابي مسلسل نسائي أردني من إنتاج نتفلكس، وأخيرا ركّز على بشاعة وأثر التنمر على الضحية.
المسلسل أحداثه في مدرسة الروابي بين الزميلات في مرحلة المراهقة والمُدرسات، مع مناقشة طفيفة لتعاون سلطة الأهالي مع إدارة المدارس للتمييز بين الطلبة.